Framleiðsla áls

Til að framleiða  1 kg af áli þarf 2 kg af súráli sem fengið er úr 4 kg af báxíti.  Síðan þarf einnig um  0,4 kg af kolefni og um 13,5 kW stundir af raforku.

Ál er framleitt í þar til gerðum kerum þar sem súrál er leyst upp í bráðinni raflausn. Raflausnin er fljótandi krýólít (Na3AlF6) sem haldið er við u.þ.b. 960°C.

Kolefnið sem þarf að brenna með súrefni súrálsins er í forskautunum.  Forskautin eyðast upp við vinnsluna neðanfrá. Hvert ker er samsett úr stálskel sem er hitaeinangruð að neðan með nokkrum múrsteinslögum og ofan á þá hitaeinangrun er lagður botn úr kolefni sem myndar bakskaut kersins. Í yfirbyggingu hvers kers er hreyfanleg skautbrú sem færist neðar eftir því sem kolin í forskautunum eyðast neðanfrá.  Milli forskauta og bakskauta er um það bil 4,3 V spenna, svipað og yfir þrjár venjulegar alkali rafhlöður.  Til að framkvæma efnahvarfið er keyrður straumur í gegnum raflausnina sem veldur því að uppleysta súrálið afoxast og verður að fljótandi áli.  

Í álverum eru venjulega nokkruð hundruð ker tengd saman í kerlínur. Á Grundartanga eru 2 kerlínur með 180 og 340 kerum sem eru með 20 forskautum hvert.  Straumurinn sem fer í gegnum hvert ker hjá Norðuráli er u.þ.b.180.000 A.  Sem jafngildir því að hvert ker notar um 780KW af raforku.  Til samanburðar notar venjuleg ljósapera um 40-60 W (sparperur: 8-11W) .Ker í kerskálum Norðuráls eru raðtengd á svipaðan hátt og perur í jólaljósaseríu þannig að straumurinn fer úr einu keri yfir í það næsta líkt og úr peru yfir í peru í ljósaseríunni.   Spennan frá fyrsta keri til þess síðasta er 800V fyrir fyrstu línuna og 1500V fyrir þá seinni.