Ekki hætta á díoxínmengun hjá Norðuráli

Eins og fram hefur komið í kjölfar frétta um díoxínmengun frá sorpbrennslum, hyggst Umhverfisstofnun  hefja mælingar á díoxín í jarðvegi í nágrenni mögulegra uppsprettna hérlendis. Þar eru álver tilgreind sem mögulegar uppsprettur. Í þessu sambandi vill Norðurál taka fram að engar fræðilegar forsendur eru fyrir því að starfsemi álversins á Grundartanga geti valdið slíkri mengun.
 
Til þess að díoxínsambönd myndist þurfa ákveðin skilyrði að vera fyrir hendi: kolefni, vatn, hiti á bilinu 600-1300°C og síðast en ekki síst klór eða klórsambönd. Við framleiðslu Norðuráls á áli með rafgreiningu er ekki hætta á díoxínmengun, vegna þess að þar vantar einn af grunnþáttunum sem þarf til myndunar á díoxíni þ.e. klórinn. Við framleiðslu Norðuráls er hvorki notaður klór né nein klórsambönd.  

Gerist það að þessi efni myndist vegna snefilmagns af klór í hráefnum eru þau fönguð í reykhreinsivirkjum og hringrásast innan rafgreiningarkerfisins.

 
Díoxín eru samansafn þrávirkra efna sem myndast  í mjög litlu magni í náttúrunni. Þau myndast meðal annars við ófullkominn bruna á jurta- eða dýraleifum en einnig af mannavöldum vegna bruna á eldsneyti við viss skilyrði og sérstaklega við brennslu á sorpi.  Efnin eru þrávirk þar sem þau eru illniðurbrjótanleg og safnast því fyrir í náttúrunni. Þessi efnasambönd eru einnig óvatnsleysanleg þannig að samansöfnunin á sér aðallega stað í mold og í fituvef plantna og dýra.